| контакт | маркетинг
КОШАРКА

10.01.2017

„Пола“ Кожув (ќе) се пресели во Радовиш


Во текот на зимскиот преоден рок се очекува „црвено-белите“ да останат без неколку играчи. Прв „излезе“ искусниот Златко Гоцевски, најавено е дека по истиот пат ќе тргнат и Цветковски, Главчев...


Празниците поминаа, но се чини дека по нив сè поизвесно станува дека екипата на Кожув ќе остане „пократка“ за неколку имиња во играчкиот ростер.
Овој „празен простор“ во првенството дел од играчкиот кадар на тимот од Гевгелија , многу извесно ќе го искористи за „преселба“ во друга играчка средина.
Па така, „излез“ од Гевгелија веќе направи еден од најискусните кошаркари на Кожув, Златко Гоцевски, за кого постојат најави дека вториот дел од сезоната ќе го помине како играч на второлигашот Радовиќ
Иако сè уште во сферата на неофицијалното, по неговите стапки во овој период на трансфери би тргнале уште неколку кошаркари кои во првата фаза од шампионатот настапуваа за екипата на Кожув.
Прв на таа листа е играчот кој дојде последен во Гевгелија. Станува збор за Горан Главчев, кој оваа сезона ја започна како играч на Младост од Земун, а пред крајот на 2016 година се врати назад во Гевгелија, каде и настапуваше во изминатите неколку сезони.
За Радовиш би требало да потпише уште еден млад кошаркар, Андреј Цветковски, кој исто така им се приклучи на „црвено-белите“ во оној средишен дел од сезоната, како играч на МЗТ Скопје со кого настапуваше во АБА Јадранската лига, но и во Еврокупот. Но, со оглед на тоа дека преодниот рок за второлигашите трае до 10 февруари, нема да биде изненадување доколку екипата која ја дели петтата позиција на табелата во Втората лига добие уште некое засилување.
И со тоа да стане еден од кандидатите кои во вториот дел од натпреварувањето во оваа конкуренција бркаат позиција која води во повисок ранг, односно во Првата лига.
Друга исто така важна новост е дека постои голема веројатност, своите мечеви во тој втор дел од сезоната екипата на Радовиш да ги игра во близината на Гевгелија, односно во салата во Негорски Бањи, која е во сопственост на поранешниот прв човек на Кожув, Томе Главчев, и кој изразил подготвеност за реализација на еден таков проект преку кој клубот од Радовиш би ги зголемат шансите за да се вклучи во борба за едно од двете места кои водат кон Првата лига.
По осум одиграни мечеви во оваа конкуренција, екипата на Радовиш има делумен ефект, односно по четири победи и исто толку порази, со кои заостанува во битката за првите две позиции на кои се Гостивар (8-0), и ФМП Академија (6-2).



Датум: 10.01.2017, 10:50
Статијата е прочитана 1769 пати.

НАЈНОВИ ВЕСТИ
14.12.2017
14.12.2017
14.12.2017
14.12.2017
14.12.2017
МИКС
повеќе >
SPORT.COM.MK 2014. сите права задржани
DEVELOPED BY Nextsense